Sahirana tokoa ny vahoaka Malagasy. Taratra izany amin’ny fisian’ny tsy fandriam-pahalemana manerana ny nosy.  Ny 16 oktobra lasa teo tokony ho tamin’ny 11 ora alina dia tranom-barotra iray indray no nisy nnanafika teny Bevomanga, fokontany Ambohiroa, distrika Ankazobe. Araka izany, novakian’ireo andian-jiolahy maromaro avy hatrany ny varavarana ka nambanany basy ny tompon-trano, avy eo nofatoran’izy ireo. Vantany vao nahare izany kapoka varavarana izany ny fokonolona dia nihazakazaka nijery ny zava-nisy, saingy tsy afa-namonjy noho ny sakana nahazo azy ireo. Araka ny loharanom-baovao voaray moa dia nanao fanamiana miaramila ny iray tamin’ireo jiolahy ireo. Ny zava-dehibe dia tsy nisy ny naratra nandritra izany fanafihana izany. Saingy voaroba kosa ny vola 317 000 Ariary sy ireo entam-barotra maromaro ary ny lamba fitafy samihafa. Very niaraka tamin’izany ihany koa ireo entana sarobidy samihafa toy ny fahitalavitra, ny “lecteur Dvd” ary ny finday iray marika Telma.  Mbola mitohy ny fikarohana ireo olon-dratsy izay tontosain’ny borigadin’ny polisy ao Ankazobe.

Anna Ra.