Raha nitsahatra efa ho 1 taona izay ny fanomezana onitra ireo taksibe mpitatitra an-drenivohitra sy ny manodidina dia hiverina indray izany amin’ity taona ity. Efa nanomana 12 lavitrisa ariary ny fitondrana ho an’izany. Io vola io moa dia natao hanampiana ireo mpitatitra amin’ny fandaniana  ateraky ny fividianana solika ho an’ny taona 2016 sy 2017 ary fandoavana ny onitra tokony naloa tamin’ny taona 2015. Hiova anefa ny fomba fizarana io fanampiana io satria hojerena akaiky kokoa ny fandaniana ataon’ny mpitatitra tsirairay ary mety ho samihafa araka izany ny vola ho azon’ny mpitatitra tsirairay avy. Hanomboka ny voalohan’ny volana novambra izao ny fizarana io onitra io  ary hifarana ny 30 aprily 2017. Efa afaka mametraka ny antontan-taratasy momba izany ireo mpitatitra eto Antananarivo, ny any Antsirabe, Toliary, Mahajanga ary Antsiranana ka eny amin’ny Att (Agence de transport terrestre) hatrany no anaterana izany. Izany no natao dia hitazomana ny saran-dalana ho 400 Ariary. Efa dinihina ihany koa ankehitriny ny fomba hampidinana ny vidin-tsolika.

Ny Tsiky R.