Anisan’ny sarotra sy mampidi-doza ny asa ataon’ireo mpamonjy voina. Mafy mantsy ny miatrika ireo voina maro samihafa mety hitranga toy ny haintrano, doro tanety sy ny famonjena olona raha sendra loza voajanahary. Mila fahavonona ara-batana, ara-tsaina ary ara-materialy izany, ary tsy misy ny fiatoana fa mila vonona na andro na alina. Naharay antso ireo mpamonjy voina tao Moramanga noho ny fisian’ny doro tanety nanamorona iny lalam-pirenena faharoa iny, afo izay nanambana ny ala iray manontolo. Tsy maintsy nizotra haingana nakany an-toerana ary ireo mpamonjy voina hanakana ny fihitaran’ny afo  ka teo amin’ny fikoropahana no niavian’ity loza mahatsiravina ity. Nivadika ilay fiarabe mpitondra rano nisy olona 16 avy amin’ny fikambanana Fanalamanga ka vehivavy 3 no namoy ny ainy voatsindrin’ilay fiara, samy naratra kosa ireo 13 ambiny ary efa mandray fitsaboana any amin’ny hopitalin’i Moramanga izy ireo ankehitriny.

Ny Tsiky R.