Maro ny fepetra ilaina raha te hamokatra voaloboka tsara sy avo kalitao hahodina ho divay, anisan’izany ny toe-tany : mila toerana avo ny fambolena voaloboka mba hiadivana amin’ny hafanana diso tafahoatra sy ny kalitaon’ny tany : tany misy ireo akora rehetra ilaina toy ny magnésium, potassium…, ary ny toetrandro. Mila rano betsaka ny fambolena azy io mba hivoarany tanteraka. Feno ny fepetra roa, toetra sy kalitaon’ny tany, raha ny ho an’ny faritry Fianarantsoa manokana. Faritra tena mpamokatra divay be indrindra eto Madagasikara ahitana ireo tena sangany toy ny clos malaza sy ny lazan’ny Betsileo… Eo amin’ny rano kosa no tsy ampy ankehitriny. Tara roa volana mantsy tamin’ity taona ity ny filatsahan’ny orana ka tsy maniry araka ny tokony ho izy ireo voaloboka nambolena. Mbola hitohy hatramin’ny volana novambra nefa izany haintany izany ka any amin’ny desambra any mihitsy vao hisy ny orana. Manomboka ny volana desambra indray anefa dia ahiana ny hisian’ny rivodoza 3 mety handalo eto amintsika izay mety hanimba indray ny fambolena iray manontolo.  Raha ny nambaran’ny mpamboly iray dia ny doro tanety lava izay mamotika ny ala rehetra manodidina no tsy mampirotsaka ny orana ary mampitombo ny entona sy hafanana. Betsaka tokoa mantsy ireo mpitrandraka arina fandrehitra izay mamoaka gony 45 isan’andro, eo koa ireo mpanamboatra biriky izay mamotika tanteraka ny ala ankehitriny. Miahiahy àry ireo mpamboly sy mpamokatra divay any an-toerana ny amin’ny mety hitoizan’izao toe-javatra izao. Efa mihena tokoa mantsy ny famokarana divay amin’izao ary miakatra hatrany noho izany ny vidiny.

Ny Tsiky R.