Ny alin’ny talata lasa teo, raha nanao fisafoana teny amin’ny faritra 67ha ny polisy avy ao amin’ny boriboritany faha-7 dia nifanena tamina mpitarika sarety iray teo amin’ny maxim 67 ha, tamin’ny 04 ora maraina. Vao nahita ireto mpitandro filaminana ireto anefa ilay lehilahy dia nikoropaka sy niezaka ny nandeha mafy. Vao mainka nampitombo ny ahiahin’ireo polisy izany ka raikitra ny fifanenjehana. Tsy afa-nitsoaka lavitra ilay lehilahy dia voasambotra. Rehefa nojerena ilay sarety dia hita fa môtô iray mifono lamba no tao anatiny. Rehefa natao ny fanadihadiana azy dia niaiky izy fa halatra io kodiaran-droa io ary tany amin’ny faritr’Ampasika no nangalarany izany ny alin’io andro io ihany. Ny alarobia maraina dia nisy olona tonga nametraka fitoriana teo anivon’ny Csp7 67ha noho ny fahaverezan’ny môtôany. Rehefa nohamarinina dia izy tokoa no topon’ity kodiaran-droa ity ka naverina taminy avy hatrany. Natolotra ny fampanoavana omaly alakamisy kosa ity olona nangalatra ity.

Ny Tsiky R.