Ny fahasalaman’ny mpiasa amin’ny sehatra tsy miankina sy ireo mpiasa Ecd ary ny fiarovana ny ain’izy ireo eny anivon’ny orinasa dia isan’ny vaindohan-draharahan’ny tahirim-pirenena na ny Cnaps. Misy ny fampiakarana ireo karazana fanampiana ho an’ny  mpiasa sy ny vady aman-janany. Eo koa ny fanafoanana  ny tatao  folo isan-jato amin’ny alalan’ny telovolan’ny Cnaps. Porofo izany fa mikatsaka hatrany ny fampiroboroboana orinasa sy ny tombontsoan’ny mpiasa malagasy tsy ankanavaka ny tahirim-pirenena. Ireo rehetra ireo no antony nahatonga ny Cnaps nandray anjara tamin‘ilay hetsika « Salon de la santé et du bien-être » na hetsika ara-pahasalamana sy fikolokoloana ny vatana, izay notontosaina tetsy Mahamasina ny herinandro lasa teo. Nandritra ny telo andro no nanatanterahana izany.  Nisy ny trano heva sy ny loabary an-dasy nentina nanabeazana ny vahoaka fa zava-dehibe ny fitandroana ny ain’ny mpiasa mba hahafahana misoroka ny loza am-perin’asa ; ny tampoka mantsy tsy maha lehilahy , ka aleo misoroka toy izay mitsabo hoy ny fitenenana. Nandritra ny hetsika no nampahatsiahivana ireo mpitsidika ny tranoheva ny fiakaran’ireo fanampiana telo atolotry ny Cnaps ka 100% izany ho an’ny fanampiana ny fianakaviana ary 20% kosa ho an’ny solon-takaitran’ny loza am-perin’asa sy ny fisotroan-dronono. Marihina fa efa nivoaka tamin’ny 01 jolay ny didim-panjakana  momban’ny fisondrotan’ny fisotroan-dronono, tamin’ny volana aogositra teo kosa ny mikasika ny fanampiana ny fianakaviana sy ny solon-takaitra. Tsy maintsy ho voatery miandry ny fivoahan’izany amin’ny gazetim-panjakana (Journal Officiel) ny Cnaps vao afaka mampihatra izany araka ny lalàna velona eto amintsika.

Nangon’i S.A