Manoloana ireo fitarainana marobe voarain’ny polisy mahakasika ny firongatry ny  fanendahana sy ny harom-paosy amin’iny faritra Analakely sy Soaranao iny dia nanatanteraka hetsika manokana ny hery vonjy taitran’ny polisim-pirenena ao Tsaralalàna na ny Uir mba hisamborana ireo mpanao ratsy. Vokany, lehilahy miisa 04 no voasambotra teo am-panaovana ny asa ratsiny teny Soarano ny sabotsy 29 oktobra 2016 tontolo andro. Ny marainan’ny sabotsy dia efa nandeha teny an-toerana ny polisy nanara-maso sy nanao ny velam-pandrika rehetra ka lehilahy miisa telo vao 17 taona no tratra ambodiomby teo am-panendahana finday teo Soarano raha tafaporitsaka kosa ny iray namany hafa niaraka tamin’ilay finday tokony tamin’ny 11 ora antoandro. Tamin’ny famotorana natao azy telo lahy ireto no nahafahana nisambotra ilay iray tafatsoaka izay tratra teny Antohomadinika ny harivan’io andro io ihany. Mbola tratra tany amin’ity farany ilay finday avy nangalarin’izy ireo. Fantatra tamin’ny fanadihadiana natao fa efa nigadra teny Antanimora ny iray tamin’izy ireo noho ny fanendahana ihany. Natolotra ny fampanoavana androany alatsinainy, 31 oktobra 2016 izy ireo.

Loharanom-baovao : Polisy