Noforonina tamin’ny taona 1998 ny Ong « lalana », ny fametrahana paikady maharitra hialana amin’ny fahantrana eny amin’ny tontolo ambanivohitra no tanjona isian’ity Ong ity. Anisan’ny asa iandraiketan’ny Lalana ny Dilk na Drafitra Itantanana ny Lalana Kaominaly izay tetikasa iray ametrahana politika fanamboaran-dalana hahafahana manampy ireo kaominina ambanivohitra amin’ny fampiakarana vokatra sy anamorana ny fifaneraserana hampisy ny fandrosoana maharitra. Ny fanamafisana ny fahaiza-manaon’ny kaominina tsirairay amin’ny fitantanana, fikolokoloana ary fanamboarana lalana no tanjona ijoroan’ny Dilk. Haharitra enim-bolana ity tetikasa ity ary kaominina 6 no handray izany : Anjozorobe, Ambongamarina, Marovazaha, Betaotao, Amboasary Anjozorobe ary Ampasina Maningory. Olona eo amin’ny 350 eo no handray ny fampiofanana mifandraika amin’ity tetikasa ity fa antenaina ho tafakatra hatrany amin’ny 35 000 ny olona tena handray ny vokatsoa amin’izany. Efa vita amin’ny antsasany izao ity tetikasa ity, efa hita daholo mantsy ireo lalana tokony ho hasiam-panamboarana ary efa afaka miroso amin’ny fanaovana tombam-bidim-panamboarana. Ny fahafatarana ireo dia ahafahan’ny tompon’andraikitra mametraka sori-dalana maharitra eo amin’ny dimy taona eo arakaraka ny vola eo am-pelatanany. Tsy mbola voasoritra mazava anaty lalàna anefa ny atao hoe lalana kaominaly ka ilana fiara-miasa amin’ny kaominina tsirairay ny fanamboarana izany. Olona 14 no efa nandray fampiofanana, 2 isaka ny kaominina niaraka tamin’ny lehiben’ny distrika sy ny lefiny, amin’ny fifehezana ny fandaminana ny asa fanamboarana. Nianarana tamin’izany ny fanamboarana lalan-tany, ny fikarakarana azy ary ny lalàna rehetra mifehy ny vondrom-bahoaka itsinjaram-pahefana. Ankoatra ny fanofanana ireo manam-pahefana sy ireo mpiasa mpanamboatra lalana dia hisy koa ny fanentanana ireo mponina hikarakara izay lalana efa vita.

Ny Tsiky R.