Tsy voafehy intsony ny fitsaram-bahoaka manerana ny nosy. Lehilahy roa indray no maty nodarohan’ny fokonolona tany Beroroha tamin’iny herinandro lasa iny. Voalaza fa nanao ratsy izy ireo saingy tsy nofaritan’ny zandary mazava ny tsy nety nataon’ireo matin’ny daroka ireo. Ny tena loza tamin’ity tranga ity dia ny Dinabe mihitsy no nitarika ny famonoana. Fantatra anefa fa efa mitsangana ara-panjakana ary ny fitondram-panjakana mihitsy no nanampy tosika tamin’ny fananganana ireny dinabe ireny. Izany hoe efa nisy fampiofanana sy fampahafantarana ny lalàna manan-kery manoloana ny fiarovantenan’ny fokonolona eo anatrehan’ny olon-dratsy izy ireny. Misy ny fombafomba sy tsy maintsy atao sy ny fanaterana ireo voasambotra eo anatrehan’ny mpitandro filaminana sy ny fitsarana noho izany. Tamin’ity indray mitoraka ity kosa dia novonoin’ny dinabe ho faty ireo olon-dratsy. Voalaza fa saika hoentina hanaovana kabary izy ireo saingy tsy nanaiky ka io no nahatezitra ny vahoaka ary niafara tamin’ny daroka nahafaty. Tsy afaka nandray ny andraikiny ny zandary satria efa maty avokoa izy roalahy vao nisy nampandre ny mpitandro filaminana. Efa misokatra kosa ny fanadihadiana hijerena izay tena zava-nitranga marina.

Cassie