Fahombiazana. Izay no azo ilazana ny asa sosialy nataon’ny Cnaps tamin’ny tontolo andron’ny alarobia omaly.  Nahatratra 83 ireo mpiasa tonga nanome rà maimaimpoana, tetsy amin’ny « Centre Médico-Social » (Cms) tetsy Ampefiloha. « Tsy vao sambany, fa efa fanaonay isan-taona ny manome rà toy izao », hoy Raobijaona Bruno, talen’ny fitantanana ny maha olona eo anivon’ny Cnaps. Tafiditra amin’ny adidin’ny orinasa amin’ny tanindrazana sy ny fanampiana ny mpiara-belona toy ny marary izany. “Ireo marary tratran’ny lozan’ny fifamoivoizana, ny vehivavy didiana eo am-piterahana, ireo marary very rà be loatra, ny olona tsy salama fa voan’ny homamiadana, ireo amin’ny ankapobeany no mila rà. Ny sokajin-drà « Rhesus négatif » sy ny AB+  no tena tsy ahitana ka maha zava-dehibe izao asa sosialy ataonay izao”, araka ny nambarany hatrany. Rehefa hanome rà ny olona salama iray dia tsy mahazo miari-tory. Raha vehivavy mitondra vohoka na mampinono na tonga fadim-bolana dia tsy afaka ihany koa. Ny lehilahy dia tsy mahazo misotro toaka iray andro mialohan’ny hanomezana rà. Ny olona iray moa dia ahazahoana paosin-drà 350 hatramin’ny 450ml. Tsy ny sokajin-taona rehetra no afaka manome rà fa voafetra hatreo amin’ny 18 taona ka hatramin’ny 60 taona irery ihany. Ankoatra ny fanomezan-drà dia maro ny asa sosialy ataon’ny fianakaviam-ben’ny Cnaps izay tafiditra ao anatin’ny Rse (Responsabilité Sociétale de l’Entreprise). Mandritra ny fanamafisana orina ny ekipa na ny « team building » ataon’ny isaka ny departemanta dia betsaka no mahazo fanampiana. Ao ny voafonja, ny marary, ny kamboty ary ny ivon-toerana samihafa eto an-drenivohitra sy ny any amin’ny faritany.

Nangonin’i S.A