Omby miisa 200 no lasan’ny dahalo omaly. Am-polony ireo malaso no tonga nanafika tao an-tanàna ary nahery vaika ka tsy nisy sahy nanohitra ny mponina. Rehefa lasa lavitra ireo mpanafika izay vao raikitra ny fanarahan-dia ary mbola andrasana ny vokatr’izany. Tato ho ato dia nirongatra be indray ny asan-dahalo any amin’ny faritra rehetra manerana ny Nosy. Arakaraka ny filazan’ny fitondram-panjakana fa hisy fepetra raikitra horaisina no vao mainka mampahery vaika ny fanafihana. Tsy mahagaga raha mifanandrify amin’ny vanim-potoanan’ny asaramanitra toy izao no mahabetsaka ny asan-dahalo. Mazava ho azy satria haingana ny fitadiavam-bola amin’izao ary hamidy hahazoana vola ireny omby angalarina ireny ary misy mpanam-bola sy mpandraharaha amin’io sehatra io no mpiray tsikombakomba mividy mora ny omby halatra rehetra. Tsy mety tratra moa ireny mpampiasa vola ireny fa ireo dahalo manafika mivantana ihany matetika no matin’ny fokonolona sy ny zandary izay tratra.

Dom