Andro vitsy monja sisa dia higadona ny fetin’ny krisimasy. Miha mitombo noho izany ny isan’ireo mpivarotra eto an-drenivohitra ary tsy araka intsony ny kalitao sy ny fenitry ny entana amidy. Raha ny vaovao azo avy amin’ny mpivarotra ihany dia miverina tonga eny amin’izy ireo indray, ny karazan-tsakafo lany daty. Tsy eto an-drenivohitra ihany fa hatrany ambanivolo mihitsy. Toy ny hena am-by fotsy, menaka, « biscuits » sy vatomamy, paty, sns… Ahitana izany avokoa manomboka amin’ny mpivarotra amoron-dalàna, dokany sy toeram-pivarotana lehibe sasany .Tsy afa-manoatra anefa ireto farany fa dia mivarotra sy mamerina ny masonkarenan’ireo mpamongady ary mivarotra mora ny entana mihitsy aza. Mampidi-doza ary mety mahafaty anefa ny fihinanana entana lany daty. Manaitra ny tompon’andraikitra noho izany ireo mpanjifa sy ireo mpivarotra fa mitera-doza amin’ny fahasalamam-bahoaka ary mety hahafaty olona maro mihitsy io fiparitahan’ny sakafo lany daty sy tsy manara-penitra io raha tsy misy ny fanapahan-kevitra hentitra amin’ny fandraofana haingana azy ireny.

Ra Tax.