Henjana tokoa ny fisisihana taksibe rehefa hariva ny andro satria maika hamonjy fodiana ny rehetra. Tsy amin’ny fiantsonana iray fa saika ho manerana ny renivohitra mihitsy izany. Matetika anefa ahitan-doza izy ireny, na jiolahy mpanao sinto-mahery ka manararaotra ny fisisihan’ny mpandeha ary misintona avy hatrany izay poketram-behivavy tazany na alaina amin’ny fomba hafa. Na mety hahita loza vokatry ny fianjerana rehefa tsy maharazona tsara ka mahatonga faharatrana na famoizana aina izany. Toy izay nitranga teny Andravoahangy ambany omaly hariva tokony ho tamin’ny 7ora sy sasany hariva. Vehivavy iray no nianjera tampoka avy eny am-pisavilihana taksibe.  Efa nahatazona ny varavarana izy no votsitra tampoka ny tanany ary mety nisy zavatra namingana azy ka nahatonga ny fianjerana. Nifatratra avy hatrany tao amin’ny kodiarana ao aoriana ny lohaliny. Raha ny fahitana azy hoy ireo nanatri-maso dia tena tapaka tokoa no tongony havanana. Nandeha mora ihany ilay fiara nidirany fa ireo olona rehetra nisisika teo ivelany no tsy nahandry ny fijanonany ka avy hatrany dia nirazona.  Navelan’ny mpamily teo ny fiara sy ireo mpandeha ary nandositra avy hatrany izy. Namerina izay manana famerim-bola ny mpanampy azy ary nanjavona avy hatrany koa. Marihina anefa fa tsy azy ireo velively ny hadisoana fa an’ilay vehivavy niharam-boina. Malaza ratsy manko amin’izao ny fitsaram-bahoaka ka naleon’izy ireo nandositra avy hatrany . Matetika mantsy tsy ny hamantatra izay anton’ny zava-nitranga  no ao an-tsain’ny vahoaka fa avy hatrany dia ny hamono.

Farah