Andro iray sisa dia migadona ny krismasy. Matetika ny ankamaroan’ny olona dia miandry efa tena akaiky fety vao mandeha mivoaka miantsena. Amin’izao fotoana izao anefa, efa feno olona ny tsena eto an-drenivohitra ary ny tsapa dia nahitana fiakarany avokoa ny entana rehetra, manomboka amin’ny kilalaon’ny ankizy izany hatrany amin’ny sakafo, indrindra fa ny akoho amam-borona. Manararoatra ny fety ny ankamaroan’ny mpivarotra ka mahatonga ny fidanganan’ny vidin’entana. Ireo izay nahay nanararaotra izany talohaloha kely no nahazo tamin’ny vidiny antonony fa ireo izay niandry andro vitsy monja alohan’ny fety kosa dia tratran’io fisondrotana tampoka io. Raha namidin’ireo mpiantoka tamin’ny vidiny 12 000 Ariary ny reniakoho lany atody iray izany hoe irony akoho vazaha irony dia niakatra hatrany amin’ny 16 000 Ariary izany amin’izao. Tafakatra hatrany amin’ny 30 000 Ariary kosa ny vanton-gisa iray ary nananika ny 20 000 Ariary ny gana mbola vantony. Niakatra tsy nisy toa izany ihany koa ny vidin’ny akoho gasy ka raha novidiana tamin’ny vidiny 7 000 Ariary mialoha ny fety, dia tafakatra hatrany amin’ny 12 000 Ariary izany nanomboka ny alatsinainy teo ary mbola nisondrotra ihany io hatramin’ny omaly. Na izany aza anefa dia mbola misy ihany ireo mpivarotra sasany tsy manaraka io fampiakaran’entana io fa mitsonjo ny mpiara-belona. Tsy eny amin’ny tsena mahazatra anefa izy ireny no mivarotra satria mahatonga lonilony eo amin’ny samy mpivarotra no manimba ny tsenan’ny sasany ihany koa. Raha ny nambaran’ireo mpivarotra anefa dia vitsy ireo olona manjifa ireny akoho amam-borona mbola velona ireny noho ny vidiny ka aleon’ny olona manjifa hena amin’ny kilao.

Ra Tax.