Sarotra tokoa ny fanabeazana ny ankizy sy ny tanora ankehitriny.  Rehefa dinihina dia antony maromaro no mahatonga izany. Fahiny, na inona na inona fitsipika apetraky ny ray aman-dreny ao an-tokantrano hifampifehezana dia mankato sy manaraka izany ny zanaka. Manana fahefana hikapoka ny mpanabe any an-tsekoly rehefa manao ditra na tsy mahay lesona ny mpianatra… Amin’izao fotoana anefa miova endrika ny tontolon’ny fanabeazana, ny zanaka no te hifehy ny ray aman-dreny, tsy maintsy mahazo izay ilaina ka raha sendra tsy misy eo am-pelatanana dia mandrahona ny hitsoaka na mitrerona ireo nahitana masoandro ary tena mahavita mangalatra na mivarotra ny zavatra ao an-tokantrano aza ny sasany . Any an-tsekoly indray dia misy ny ray aman-dreny tsy mamela ny zanany hobeazina fa handray fahalalana fotsiny ihany. Ny lalànan’ny fampitana fahalalana anefa dia tsy afa-misaraka ny fanabeazana sy fampianarana.

Omaly alatsinainy 26 desambra àry dia mpianatra fito  mirahalahy no tratran’ny mpitandro filaminana nanendaka ny mpiara-mianatra amini’izy ireo tany Mahajanga, teo amin’ny lalana mihazo ny Gymnase Couvert. Mety efa tsikaritr’izy ireo fa nisy fakan-tsary tao anaty kitapon’ity namany ka niandrasan’izy ireo tamin’ny firavana.  Araka ny loharanom-baovao, avy hatrany  dia nikapoka ity lasibatra ny iray, ny hafa nisintona ilay kitapo nisy ity fitaovana sarobidy. Niantso vonjy izy ka tonga ny polisy ary nisambotra ireo zaza maditra avy hatrany.   Tafatsoaka ny telo tamin’izy ireo fa ny efatra kosa voatazon’ny manam-pahefana. Tena mbola zaza avokoa satria vao 13 hatramin’ny 17 taona monja dia efa mahavita asa maizina toy izao. Efa eo am-pelatanan’ny manam-pahefana ny famotorana ireto zaza mbola mpianatra efa mahavita asan-jiolahy ireto. Tokony samy hiezaka ho hentitra amin’ny fanabeazana ny tompon’andraikitry ny fanabeazana rehetra satria misy diso fiheverana ny sasany ka te hifehy ray aman-dreny sy ny mpanabe ary rehefa anarina na bedesina amin’izay tsy mety natao dia mandositra miala ny tokantrano. Eo koa ireo te haka tahaka ny namana ka mahavita mangalatra rehefa tsy manana fahafahana ny ao an-trano.

Tahirisoa