Notanterahina ny andron’ny Krismasy teo ny famaranana ny fifaninanan-kira mitondra ny lohateny hoe « La Voix d’or » izay nokarakaraina ho an’ny ankizy mankafia hira taloha. Mpifaninana an-jatony maro no nisoratra anarana tany am-piandohana saingy rehefa nandeha ny fifaninanana dia vitsy sisa  no tavela ireo izay mahay mihira indrindra ka voasafidy handray anjara tamin’ity famaranana ity. Taorian’ny seho notanterahin’ny ankizy tsirairay dia i Tendry no voasafidin’ireo mpitsara telo mianadahy izay nahitana an’i Jaojoby, Anyah ary Deenyz. Sidina mankany amin’ny Disney land ao amin’ny renivohitry Lafrantsa no loka goavana azony tamin’izany. Fivahinianana izay hotanterahiny miaraka amin-drainy sy olona iray safidiny. Marihina fa toerana anisan’ny tsara indrindra ary tian’ny ankizy indrindra ao Parisy izy io ary kilalao tsy fahita firy no tena maro ao. Ankoatra izay dia nahazo solosaina azo entina mandehandeha koa i Tendry ankoatra ireo loka maro tsy voatanisa. I Tendra izany no feo tsara indrindra na « Voix d’or ». Mampanantena andiany faharoa sahady ireo mpikarakara.

T.A.