Raha hamono akoho dia mbola misy fierana sy dinika ataon’ny mpivady. Ankehitriny anefa mora noho ny mamono biby ny mandatsaka ain’olona. Rehefa misy lonilony, na fialonana, na tondro molotra fotsiny dia efa entin’ny sasany handatsahana aina izay. Tsy lazaina intsony ny fitsaram-bahoaka atao amin’ireo mpangalatra tratran’ny fokonolona na olona izay lazaina ho nanota fady toy ilay nitranga tany Mananjary. Lehilahy iray vao 25 taona monja àry no novonoin’ny olon-dratsy miisa 3 tany Antanambao-Ambodimanga, fokontany sy kaominina ambanivohitry Manompona, Distrika Soanierana-Ivongo, faritra Analanjirofo. Efa tamin’ny 17 desambra 2016, izy io no tsy hitan’ny fianakaviana sy ny mpiara-monina aminy ka nanao filazana tany amin’ny mpitandro filaminana ireo akaiky azy. Ny vaovao azon’ny zandary tamin’ny 20 desambra teo no nahitana ny razana, tamin’ny fidinana teny an-toerana narahina fanadihadiana. Efa voasambotra izy telolahy ireo ary efa manao ny famotorana ny borigady ao Soanierana-Ivongo.

Farah