Fotoana fanararaotan’ny mpivarotra zava-pisotro misy alikaola ny andro fety, indrindra ny faran’ny taona. Amin’io ihany koa anefa no tonga manararaotra ireo jiolahy satria mahatsikaritra fa betsaka ny olona no miantsena. Tamin’ny 30 desambra 2016 tamin’ny 11 ora alina teo àry dia jiolahy efatra no tonga nanafika toeram-pisotroana iray, tany Vohitsara, kaominina an-drenivohitr’i Toamasina. Nirongo fitaovam-piadiana ireo jiolahy ireo tamin’izany ka naratra mafy voatsatoky ny jiolahy iray tamin’ny antsy ny raim-pianakaviana tao amin’ilay tranombarotra. Niantso vonjeo ny iray tamin’ireo tao an-trano ka rifatra nandositra niaraka tamin’izay ireo olon-dratsy. Tsy nisy ny entana na vola lasan’izy ireo. Tsy nisy ihany koa ny aina nafoy fa ity raim-pianakaviana ity no  naratra ary nentina avy hatrany teny amin’ny hopitalibe ao an-toerana ihany. Ny borigadin’ny zandarimariam-pirenena ao Toamasina no misahana ny fanadihadiana. Mila manamafy ny fiarovana ireny mpivarotra ireny satria sarotra ny mifehy ny filaminana sy ny fandriam-pahalemana amin’izao fotoana izao.

Farah