Anisan’ny toerana be mpamboly rongony miafina indrindra raha i Vohemar no resahina. Ny faran’ny herinandro teo dia voly rongony amin’ny tany midadasika mirefy roa hekitara be izao no saron’ny polisy miady amin’ny zava-mahadomelina tao amin’ny toerana iray antsoina hoe Ambararata, fokontany Ambodimanga I ao amin’ny kaominina Ampanefena. Fiaraha-miasa teo amin’ny mponina sy ny polisim-pirenena tao an-teorana notarihin’ny kaomisera Tombozafy no nahafana namantatra io toerana fambolena rongony miafina io. Raha ny vaovao azo dia nambolena niaraka tamin’ny vary ireo jamala ireo ary misy mihitsy ireo mikarakara manokana ny voly. Nanditra ny fidinana ifotony nataon’ny polisy tao Vohemar dia tra-tehaka teo ampikarakarana ny voly rongony ny lehilahy iray. Tamin’izany indrindra no nitenenan’ny mpitarika ny polisy miady amin’ny zava-mahadomelina tao Vohemar fa hohamafisina ny fanaraha-maso ireo toerana mety hisian’ny fambolena rongony antsokosoko izay tena voararan’ny lalàna tanteraka. Noho ny fiparitahan’ny rongony ao Vohemar lasa “bizina rapida”, ary roboka midoroka hatramin’ny tsy ampy taona mantsy dia ezaka tsy maintsy ataon’ny mpitandro filaminana ny fikarohana ireo mpandray, mpivarotra ary mpanondrana jamala ao an-toerana. Tao anatin’ny telo volana, voly rongony amin’ny hektarany maro no sarona ka nodorana imasom-bahoaka raha ny fanampim-panazavana azo tao amin’ny polisy misahana ny ady amin’ny zava-mahadomelina. Na izany aza dia mbola maro ireo toeram-pambolena jamala antsokosoko eto Madagasikara. Mbola mitohy ny fikarohana ny naman’ilay mpamboly tratra.

Ra Tax.