Rahoviana vao handry fahalemana i Madagasikara? Miaina anaty fitaintainan-dava ny vahoaka noho ny afitsok’ireo manasokajy ny tenany ho fahavalom-bahoaka na ireo dahalo sy jiolahy mpanao fanafihana isan-karazany izany. Tamin’ny 4 janoary 2017 tamin’ny 9 ora sy sasany alina dia nisy andian-jiolahy mitam-piadiana nanafika trano iray tany amin’ny fokontany Talata Tsimadilo, ao anatin’ny distrikan’Arivonimamo. Nitora-bato ny trano ireo jiolahy ka niantso vonjy avy hatrany ny tao an-trano raha nahare izany. Avy hatrany dia nivoaka ny fokonolona ka rifatra nandositra niaraka tamin’izay ireo jiolahy. Taorian’ny fahalasan’ireo olon-dratsy dia mbola nijery izay faritra maizimaizina ny mponina. Tsy nahita jiolahy niery intsony fa basy fohy vita gasy sy kitapo feno ody gasy miaraka amin’ny taratasy mirakitra ny paikadin’ireo jiolahy hoenti-manafika no  hita tao. Tsy nisy aina nafoy na olona naratra na fananana very tamin’izao fanafihan-jiolahy izao. Misokatra ny fanadihadiana.

Farah