Omaly no nanatanteraka  ny fiarahabana ny aresevekan’Antananarivo nahatratra ny asaramanitra ny kristianina katolika eto amin’ny Vikaria episkopaly afovoany.  Solontena roa isaka ny distrika enina mandrafitra ny Vea no nandray anjara tamin’ny fanafanana ny lanonana. Izany hoe paroasy roa isaka ny distrika. Efa fanaon’ny Ekar ny manaja raiamandreny toy izao isan-taona ho fanomezam-boninahitra sy fankasitrahana azy amin’ny fanoloran-tena manompo ny vahoakan’Andriamanitra. Ny anjaran’ny eto amin’ny renivohitry ny diosezy no tontosa omaly fa ny vikaria atsimo, andrefana, manodidina dia amin’ny amin’ny Alahady 15 janoary 2017 no hanatanteraka ny fanaterana ny jaka ho an’ireo raiamandreny. Marihina fa fetin’ny fianakaviana masina koa amin’io daty io sady famaranana ny jobily faha-95 taonan’ny Seminera zandriny Ambohipo. Nambarany tamin’ny laha-teny izay nataony fa faly izy mahita ny ezaka ataon’ny tsirairay. Ankoatra izany dia nohamafisin’ny Eveka tamin’ny fandraisam-pitenenany ny fahatongavan’ny solontenan’ny Papa François hitarika ny fankalazana ny faha-50 taona ny fifandraisana ara-diplomatika eo amin’ny fiketrahana masina sy i Madagasikara. Koa hifampitaona eny Mahamasina indray izy ireo handray izany vahiny manan-kaja izany noho io fotoan-dehibe io. Navoitrany ihany koa fa tsapany sy hitany ny fandrosoan’ny vikaria afovoany noho ny firaisankina sy fiombonan’ireo tompon’andraikitra, indrindra ny fanentanana ireo kristianina handray andraikitra. Nofaranany tamin’ny firariantsoa sy ny fanomezan-tsodrano ireo rehetra tonga nanatrika ny fotoana.

Tahirisoa