Tsy amin’ny faritra iray ihany fa saika efa manerana ny faritra 22 ny tsy fandriam-pahalemana ankehitriny. Fifanandrifian-javatra sa vokatry ny fialonana sa tsy fahazakana resy no namoizan’ny Flavien na Lalavy ny ainy tao anatin’ny fotoana fohy monja, izay mpanao moraingy fanta-daza ao amin’ny Fokontany Antanambao-Sotema any Mahajanga? Nisy lalao moraingy nandraisany anjara  tamin’ny alahady hariva lasa teo ka nandresy izy. Araka ny loharanom-baovao dia nody nanatitra ny valin-kasasarany tany amin’ny vady aman-janany izy taorian’ny lalao. Ora vitsy taorian’izay, niera tamin’ny vadiny izy mba hivoaka kely ka nomen-dramatoa alalana. Niandry ela anefa ny tao an-trano fa tsy niverina izy. Omaly alatsinainy maraina dia vatana tsy misy aina intsony no hitan’ny mpandalo tao anaty rano maloto. Eo ampelatanan’ny mpitandro filaminana ny raharaha.

Farah