Maro ny Ecd na ny mpiasam-panjakana mbola tsy raikitra izay tsy misitraka ny zony. Nivoitra koa fa tokony hasiana fepetra manokana ny mikasika ny karaman’ny mpiasa Ecd fa manana olana manokana izy ireo tahaka izany koa ny momba ny latsakemboka arotsaka eny amin’ny Cnaps. Nampiantrano ny fiofanana, karakarain’ny Tahirim-pirenena momba ny fiahiana ara-tsosialy na Cnaps (Caisse Nationale de Prévoyance Sociale), izay miompana amin’ny fanatsarana ny fitantanana ny dosien’ny mpiasa ny renivohitry ny faritra Matsiatra Ambony. Isan’ny nandray anjara tamin’izany ny sampan-draharaham-panjakana isan-tokony eo anivon’ny faritra ary nanatevina ny mpiofana ny solontenan’ny orinasa tsy miankina.

“Tsy mahafantatra ny vokatry ny fahataran’ny fanaterana taratasy eny amin’ny Cnaps ny mpiasa sy ny mpampiasa izahay” raha fintinina ny hevitra naroson’ireo mpiofana. Aretina iraisana amin’ny sehatra maro samihafa tokoa io.  « Tsy mahafeno ara-potoana sy ara-dalàna ny fanambarana ny filazan-karama na déclarations nominatives des salaires ny mpampiasa ». Vokatr’izay tsy mahafeno ara-dalàna ny antotan-taratasy izay dia lasa miverimberina ny olona na ny mameno azy any ampiasana na izay voairaka hanatitra izany. Nilaza ireo tompon’andraikitry ny vondrom-bahoaka nandray anjara fa mila ampitomboina ny fanampiana omen’ny Fanjakana foibe ho azy ireo ary koa tsy tokony ho tara.  Ny Tahirim-pirenena (Cnaps) sy ny Tahirim-bolam-pirenena dia mila mampitovy ny fomba fiasa eo amin’izy roa tonta. Izany no angatahana dia hanamorana ny famenoana ny dosie. Farany, mangataka ireo mpiofana mba haloa isaka ny volana desambra ny latsakemboka telovalana fahefatra fa tsy ny volana janoary.

Nangon’i S.A.