Nalaza ary vao mainka tena mampatahotra ny Malagasy ny vary plastika. Maro tokoa ny olona mitaintaina fatratra, indrindra ireo misakafo eny amin’ny hotely fa sao hihinana ny tsy fihinana araka ny fomba fiteny. Efa betsaka mantsy ireo milaza fa efa tonga eto an-drenivohitra ny vary plastika ary efa varotana eny amin’ny tsena maro mihitsy. Ny ministeran’ny varotra anefa manoloana izany dia mbola mihizingizina fatratra fa tsy misy ary tsy ho tonga eto Madagasikara mihitsy izany vary vita amin’ny plastika izany.

Hatramin’izao rahateo tsy mbola nisy olona sahy nanome porofo ny amin’ny fisian’io vary io. Hatreto izany dia mbola fanontaniana mipetraka ny  hoe misy tokoa ve izy io sa tsaho mandeha fotsiny? Omaly anefa dia vehivavy iray no nilaza fa narary mafy vokatry ny fihinanana vary plastika.

Raha ny nambaran’ity farany dia nisakafo tao amin’ny toeram-pisakafoanana iray teto an-drenivohitra izy ary tsy nahalany efatra sotro akory dia nandoa. Tsy nitsahatra nandoa ilay vehivavy ary tsy maintsy nandeha dokotera. Teo no nahafantarana fa nihinana sakafo tsy ara-pahasalamana sy tsy ara-dalàna izy.

Mbola mandeha amin’ izao fotoana ny fanadihadiana satria tsy mbola tena fantatra na vary be karibonetra no nahatonga ny aretina na tena vary plastika marina. Marihina fa tsy izy irery no narary rehefa nisakafo tao amin’io toerana io.

Nangonin’i Ra Tax.