Ny “”Engin”, na irony fiara lehibe fampiasan’ny orinasa  dia lasa  omby vavy be ronono ohatramin’ny anarana iantsoan’ireo mpangalatra gazoala azy. Mitovitovy rahateo ny vidin’ny iray litatra amin’ny rononon’omby sy gazoala iray litatra any amin’ny varomaizina. Ary dia mitety ireo “Engin” tsirairay mihitsy ny mpangalatra rehefa mitroka izany gasoil izany. Misy amin’ireo mpangalatra no maka vola mialoha amin’ilay mpaniraka ary mampanantena fa tsy maintsy mahita.Toy ny any  amin’ny faritra rehetra dia mirongatra ny halatra gazoala sy tariby eny Tanandava,  Toamasina. Anisan’ny lasibatra amin’izany ny orinasa Ambatovy. Jiolahy miisa 12 no nandroba magazay fitehirizan’entana an’Ambatovy ao Ambodinonoka Fokontany Tanandava ny faran’ny herinandro teo.  Nofatoran’ireo jiolahy ireo mpiambina an’ilay mangazay ary dia nanao izay tiany hatao ireo olon-dratsy. Lasa tamin’izany ny tariby mirefy 50m raha ny loharanom-baovao voaray.  Tafaverina kosa ny tariby 10m izay tsy lasa lavitra fa navelan’ireo jiolahy tsy lavitra an’ilay magazay ihany.

S.A