Mitarazoka ny fandraisana andraikitry ny Fanjakana. Leo delestazy ny vahoaka malagasy. Taorian’ny fanambaràna nataon’ny vahoakan’i Marovoay izay mandrahona ny hanao fitokonana dia nilaza ny heviny koa ny ao Mahanoro.  Manoloana ny hirifiry ateraky ny delestazy diso tafahoatra, nanomboka ny fiandohan’ity volana janoary ity dia tena mampiteny ny moana tokoa raha ny zava-misy ao an-toerana.  Maharitra tapak’andro ny faharetan’izany,  izay manomboka amin’ny 4 ora maraina ka tsy miverina raha tsy amin’ny 6 ora hariva. Vaky taraina noho izany ireo olona mivelona amin’ny seha-pihariana mandeha amin’ny herinaratra. Toy ny tsikaritra any amin’ny faritra maro anefa dia tsapa fa ny faktiora tsy mba misy fihenana fa ny mifanohitra amin’izany no miseho isam-bolana.

Milaza hampiseho ny firaisankinany ny vahoaka manoloana ny zava-misy any an-toerana. Rehefa manampin-tsofina ny Fanjakana dia mampitandrina ny hanao toy ny zava-niseho tany Andapa sy ny tanàna hafa koa ireo mponina.  Mandrahona ny hitokona izy raha ny tatitr’ireto solontenan’ny mponina avy any Mahanoro ireto. Nambaran’izy ireo aza fa hilahatra hitanjozotra ho eny amin’ny biraon’ny Jirama hangataka fanazavana feno sy mitaky ny hamahana izany delestazy izany haingana izy ireo. Tsy nanambara ny ora na andro hipoahan’ny rako-bilany amin’ny hetsika ireto solontenan’ny mponina avy any Mahanoro ireto. “Ny azo antoka, hoy izy ireo, dia tsy ho ela”. Hotaterina eto ihany ny mety ho akon’izany rehetra izany.

Nangonin’i S.A