Mampiaka-peo ireo mpampiasa moto ao an-drenivohitry Betsimisaraka. Niakatra ho 5000 ariary ary tsy mahazo izany raha tsy mandalo “visite technique”, izay mbola andoavana vola 10 000 ariary isaka ny môtô anefa. Ho an’ireo mpanjifa dia fanararaotana no ataon’ireo tompon’andraikitry ny Kaominina mahita ny hamaroan’ireo olona mpampiasa izany fitaovam-pitaterana izany ao an’toerana. “Ben’ny tanàna … “conseillers municipaux” ianareo no tompon’ny Toamasina ankehitriny ka afaka manao izay tianareo hatao amin’ny fampiakarana hetra (vignette môtô….) tsy misy fampilazana akory… Mankaiza anefa ny vola toy ireny satria toa tsy tazana mihitsy ny fanatsaràna ny tanàna fa vao mainka aza mitotongana ny lazan’i Toamasina hoe : « capitale des ordures « ..asio asa manamarika fa mahay mitantana ianareo azafady. Raha toa ka betsaka loatra ny olona efaina karama nefa tsy miasa… esory” hoy  Andry Ratsimba mponina ao Toamasina.

Raha kajina tsotsotra hoe arivo ny isan’ny môtô mivezivezy ao antampon-tanànan’i Toamasina ka ampitomboina  15 000 Ar  dia manome 15 000 000 Ar ny vola miditra amin’izany nefa efa amanaliny ny moto mivezivezy eto amintsika. Mba hisy tamberin’andraikitra hiverina amin’ny mponina anefa ve io fandoavana vola be io sa ahoana, eny na dia ny fanatsarana ny fifamoivohizana fotsiny aza ? Môtô  fotsiny no resaka eto fa mbola tsy resahana ny mikasika ny Bajaj izay manomboka efa mameno tanàna amin’izao fotoana izao.

Safidy Andrianina