Miverina mahazo laka indray amin’izao fotoana ny resaka fanendahana mampiasa « bois rond ». Omaly, raha toa ka hafaliana ny an’ny mponin’Antananarivo fa avy ny orana dia  fahoriana kosa no nahazo ireto olona lasibatry ny fanendahana tamin’ny toerana telo samihafa ireto. Nandritra iny oram-be omaly iny dia olona telo no naratra mafy nandritra ny fifandonana tamin’ny mpanendaka. Ny iray teny Ampasapito, ny iray teny amin’ny faritra Anosy Be ary ny iray farany kosa tsy mbola fantatra hoe taiza no nahavoa azy. Raha ny nambaran’ny mpitsabo iray teny amin’ny Hjra dia voa mafy teo amin’ny faritry ny lohany avokoa izy telo lahy ireto ary samy mbola tsy nahatsiaro tena avokoa no nisy nitondra tany amin’ny hopitaly. Ilay lehilahy iray no tena voa mafy ary mbola atahorana ny fahasalamany noho ny rà betsaka very. Izay no tsy mbola nahafantarana ny toerana nahavoa azy, ny olona nitondra azy rahateo avy dia lasa. Lehilahy 21, 30 ary manodidina ny 24 taona eo ireto lasibatra ireto. Raha ny vaovao voaray hatrany dia nilaza ny lehilahy iray voaendaka tamin’ireo fa fantany ny olona nahavita nandroba azy. Ny zavatra hita sy tsy azo lavina aloha dia tena vely « bois rond » no nahazo ireto olona ireto. Ireto farany mihitsy no nanamarina izany. Aiza ho aiza ny mpitandro filaminana manoloana izany, sa matoritory any an-tranony fa avy ny orana ?

Ra Tax.