“Ataovy izay ataon’ialahy fa izaho tsy manana”. Nisy tokoa ireo taxi-be nampihatra ny fampiakarana ny saran-dalana ho 500ariary, omaly alarobia 01 febroary araka ny didy navoakan’ny tompon’andraikitra, anisan’izany ny 119. Sahiran-tsaina ny vahoaka satria tsy mba misy elanelam-potoana lavalava fa dia mitohy vakana ny fiakaran’ny vidim-piainana ka tsy misy intsony ny toe-tsaina vonona hanara-dalàna fa dia ny hifanohitra hatrany. Rehefa tonga teo Antsakaviro nitaky saran-dalana ity mpanampy ny mpamily ary nilaza tamin’ny mpandeha fa “500 ariary daholo ny frais fa tsy misy 400 intsony”. Tezitra ity raim-pianakaviana iray raha nandre izany avy dia nampiaka-peo sy nilaza fa “ataovy izay ataon’ialahy fa izaho tsy manana afa-tsy 400 ariary”.  Na iza na iza manana ny rariny amin’ny andaniny sy ny ankilany tokony mba hasiana ny fifanajana satria tsy hahavaha olana mihitsy ny fifamaliana imasom-bahoaka sady tsy fahaizana manome lanja ny fiizin’ny tena fa fahafaham-baràka.

Farah