Efa fahadalana ve sa sorisorin’ny toe-draharaha misy eto amin’ny firenena ny olona sasany ka dia mahavita mandatsak’aina amin’ny tsy antony ? Sarotra tokoa ny fiainana fa ny fahatoniana ihany no vahaolana enti-miatrika izany. Tamin’ny zoma 10 febroary lasa teo tokony ho tamin’ny 12 ora alina, tany Ambohitromby ao amin’ny fokontany Andranomamy, distrika Ambato-Boeny, faritra Boeny. Lehilahy iray no nitifitra nahafaty ny renim-pianakavina 47 taona eo ho eo. Araka ny vaovao voaray dia ny filoham-pokontany ao an-toerana no nanome vaovao ny mpitandro filaminana. Rehefa nahavita ny asa ratsiny ity lehilahy ity dia rifatra nandositra. Araka ny fanazavan’ny vehivavy iray mpiray trano tamin’ity maty dia niditra an-keriny tao an-trano io tovolahy io, tsy nisy halatra na resaka nifanazavana fa avy hatrany dia nitifitra ilay vehivavy, izay efa toa anatin’ny torimaso tanteraka. Teo anatrehan’izany, nandray ny andraikiny ny manam-pahefana rehefa nazava tamin’izy ireo ny fandehan-draharaha rehetra tao amin’ity tokantrano ity. Natao ny fikarohana ka tratra ihany ilay nahavanon-doza. Ny zandary avy any Andranomamy no manao ny fikarohana. Mila fampatsiahivana ny fahazoana mampiasa basy eto amintsika fa tsy izay rehetra mahay mandray izany akory dia afaka mampiasa avokoa ka mahavanon-doza amin’ny mpiara-belona ny sasany rehefa tsy mahafehy tena.

Farah