Hentitra tanteraka ny minisitry ny fanabeazam-pirenena amin’ny fanaraha-maso ny fandraisana ireo mpampianatra Fram ho mpiasam-panjakana.

Tamin’ny herinandro lasa teo dia nanao fampitandremana ho an’ireo chef Cisco rehetra ny minisitry ny fanabezam-pirenena Paul Rabary ny amin’ny fandraisana ireo mpampianatra Fram ho ara-dalana amin’ny maha mpiasam-panjakana azy ireo amin’izay. Notsindriany mafy tamin’izany ny ao amin’ny distrika Fandriana Faritra Amoron’i Mania satria diso mibaribary loatra ny fanaovana kolikoly eo amin’izany sehatr’asa izany, indrindra ny famoahana ny anaran’ireo mpampianatra voaray ho mpiasam-panjakana raikitra tamin’ny andiany fahefatra.

Araka ny vaovao voaray farany, dia nametra-pialana ity tompon’andraikitra tsy mahafehy ny asany amin’ny maha mpanabe azy ity fa nanararao-pahefana sady tia tena.Tsy mba nahay nametraka ny tenany ho modely sy fakan-tahaka tsara. Fanabeazana sy fampianarana, famolavolana olona ho tompon’andraikitra eo amin’ny fiarahamonina sy ny firenena nefa dia atao alasafay fotsiny izao noho ny fitadiavana tombontsoa manokana. Raha hentitra toa ny minisitry ny fanabezam-pirenena ny tompon’andraiki-panjakana rehetra eto amin’ny firenena dia azo antenaina fa ho afaka ao anatin’izao kizon’ny fahantrana izao ny firenena satria ny kolikoly no fototra tsy mampandroso. Tsy tazana eo amin’ny sehatry ny asa ireo avara-pianarana mahafehy ny asa tokony hatao fa ireo kamo saingy manam-bola no mahazo seza, hany ka ny hamerina izay niala am-paosy nividianana toerana no vaindohan-draharaha fa tsy ny hitady izay fomba hahitana hevitra ho an’ny tombontsoa iombonana.

Tahirisoa