Horohoro sy tebiteby lalandava no iainan’ny Malagasy amin’izao fotoana izao. Vono olona etsy sy eroa foana matetika no vaovao mba hita eny amin’ny lohateny an-gazety. Midika izany, ary tsy azo lavina fa tsy ampy ny fandraisan’andraikitry ny fitondram-panjakana ny amin’ny famongorana ireo olon-dratsy, na ny amin’ny fanenana ny tsy fandriam-pahalemana eto amin’ny tany sy ny firenena fotsiny. Mampalahelo mantsy fa mirongatra ny habibiana etsy sy eroa ary maro ireo olona tsy manan-tsiny no matimaty amin’ny tsy misy dikany. Ny alatsinainy antoandro lasa teo izao no nitrangana vono olona miharo habibiana teny Ambohidratrimo, fokontany Mahatsinjo ao anatin’ny kaominina Anjanadoria. Ramatoa iray voalaza fa bevohoka no nisy nanolana sy novonoina avy eo nariana tao anaty tatatra ny fatiny. Raha ny vaovao azo dia mpampianatra io vehivavy vao herotrerony io satria manodidina ny 26 taona eo ho eo izy.

An-dalana namonjy fodiana izy no nifanehitra tamin’ireo tsy mataho-tody izay avy hatrany dia nanararaotra azy. Ny lalana rahateo mangingina ka mora tamin’izy ireo no nanolana ilay ramatoa. Tsy nanaiky mora ilay vehivavy ary tsy maintsy notaperin’izy ireo ny ainy. Rehefa hita fa tsy misy aina intsony ny vatany dia natsipin’izy ireo tao anaty tatatra izy, ary ny lohany no nalefany aloha. Ny razana dia tsy hitan’ny fianakaviana raha tsy ora vitsy taty aoriana taorian’ny fikarohana natao. Rehefa nahavoaray ny vaovao ny zandary dia nidina an-toerana niaraka tamin’ny dokotera. Rehefa nozahana ny vatan’ilay vehivavy dia hita fa niharan’ny fanolanana faobe izy ary teo koa no nahitana fa mitondra vohoka 3 volana izy. Nahitana faritra maratra ihany koa ny vatany manontolo ary hita fa niharo daroka ny fanolanana azy.

R.T.