Raha ny zava-misy eo amin’ny fiainam-piarahamonina ankehitriny no dinihina dia sekoly natao mba hidiran’ireo zaza avy amin’ny fianakaviana sahirana an-tsekoly sisa ny Epp na ny sekoly fanabeazana fototra. Ireo  manan-katao kosa mahaloa saram-pianarana lafo isam-bolana dia mandefa ny zanany any amin’ny sekoly tsy miankina. Raha dinihina dia toeram-piahiana ny mpiray tanindrazana sahirana mba ho afaka miditra an-tsekoly ireo kilonga madinika. Mahavariana ihany anefa fa misy ireo mbola mahavita manararaotra ireny toeram-panabeazana ireny toy izay nitranga tao amin’ny Epp Antandrokomby, kaominina Anosizato Andrefana, ao anatin’ny distrika Antananarivo Atsimondrano.

Nisy nandroba ny alin’ny alarobia hifoha omaly alakamisy 16 febroary 2017 ity sekoly fanabeazana fototra ity. Araka ny loharanom-baovao dia very tamin’izany ny solosaina roa, ny vilanin’ny sekoly miisa roa, kidoro sivy sy boky vitsivitsy, ankoatra izay mbola tsy voasoratra, araka ny fampahafantarana nataon’ny Talen’ny Epp Randrianjafy Elidio. Misy mpiambina ny sekoly. Tsy afa-nanohitra anefa izy satria nirongo fitaovam-piadiana ireo jiolahy sady nanambana azy tamin’ny antsy. Efa-dahy ireo nanafika araka ny fitantaran’ity farany. Tsapa fa miezaka ireo tompon’andraikitra amin’ny fampandrosoana ny sekoly mba hitovian’ireo zaza beazina ao mba hitovy amin’ny rehetra. Izao anefa dia misy tsy mataho-tody ka sahy mandroba izay mba fananana ampiasaina amin’ny fampandehanana ny fanabezana sy fampianarana sahanin’ireo mpanabe ao an-toerana.