Tena Tsy Rariny ! Zanak’anabavina mpanao gazety  iray no saika hanamboatra kopia tao amin’ny Boriboritany fahefatra, ao anatin’ny Kaominina Antananarivo Renivohitra. Zaza teraka tamin’ny 31 janoary 2017, nanamboaran’ny rainy kopia fahaterahana tamin’ny 6 febroary 2017 no nilazan’ilay tompon’andraikitra ao amin’ity boriborintany fahefatra , fa amin’ny 11 avrily 2017 vao vita izany kopia izany. Raha nanontany ny rain’ilay zaza tamin’ny andro nahatongavany hanamboatra kopia io hoe « fa maninona no telo volana vao vita? » dia teny anavona no namalian’ity mpiasam-panjakana tompon’andraikitra fa « izay no fandaminana », raha ny fitantarany.

Voatery nanelanelana ity Mpanao gazety ka rehefa novonjeko ny lehibe tao ny 20 febroary dia raikitra ny fifanilihana andraikitra hoe « atsy amin’ny varavarana faha 11 no tompon’andraikitra amin’io, vonjena ny ao, milaza fa ao amin’ny varavarana faha 12 no tompon’andraikitra amin’io. Dondomina ny any tsy misy olona. Niverenana tao amin’ny birao teo aloha ary nampiana safoaka kely hoe tsy manaiky an’izao aho fa havoakako gazety izao fa misy raha tsy manjary », araka ny fitantaran’ity mpanao gazety.

Hagagana ny azy fa kay vita haingana ihany ny kopia fahaterahana eto Madagasikara.  Ary vita miaraka amin’ny vava hoe miverena rahampitso faha 21 febroary maka azy. « Voatery lasa biby fampitahorana tsy fanahy iniana ny asa fanaovan-gazety », hoy hatrany ny fitantarany.  Inona tokoa moa ny antony izany fa dia ilay fitiavana tsolotra daholo no mahatonga izany. Izay tsy mahalala olona sy tsy manan-katolotra dia tsy maintsy miandry ilay telo volana. Ahoana izany ny gasy kely rehetra tsy afaka mamaly ny lehiben’ny boriboritany ? Tsy karana, tsy sinoa ary tsy vazaha no tsy mampandroso an’i Madagasikara fa isika samy Malagasy ihany no mifanabotry. Porofo mazava fa tsy avy amin’ny fitondrana foibe no mahatonga izao fa isika samy madinika ihany raha toa ka azo sokajiana ho madinika ihany ilay mpiasam-panjakana tao amin’ny boriboritany fahefatra, kaominina Antananarivo.

Safidy Andrianina