Nisy fanafihan-dahalo mirongo basy tany amin’ny fokontany Ambatobe distrikan’i Tsaratanàna tamin’ny 17 febroary lasa teo ka omby miisa 250 no very tamin’izany. Taorian’izany dia nisy ny fanarahan-dia nataon’ny mpitandro filaminana sy ny andian-dehilahy maromaro tao an-tanàna. Nisy ny fifandonana teo amin’ny roa tonta ka maty voatifitry ny miaramila ny telo tamin’ireo malaso. Avy hatrany dia vaky nandositra ireo namany raha nahita ireo namany lavon’ny balan’ny mpitandro filaminana. Vokany, tafaverina avokoa ireo omby nokasain’ireo dahalo halaina an-keriny. Nandritra izany fitsoahana izany dia nisy ihany koa ny fitaovam-piadiana votsotra teny ampelatanan’ireo dahalo ka nangonin’ireo miaramila. Ny loharanom-baovao no nahalalana ny filazàn’ny kaomandin’ny faritany miaramila ao Mahajanga fa entina ao amin’ny tobin’ny miaramila Capsat eo Soanierana eto Antananarivo avokoa ireo fitaovam-piadiana tratra rehetra tany amini’reo olon-dratsy ireo. Izany no hatao dia mba hanaovana ny fahadihadiana sy ny fikarohana ny tena tompony, mba hahafantarana indrindra ireo mpitandro filaminana izay mampiasa azy ireny ka sahy manome izany ny dahalo mba hambotriana ny vahoaka.

Farah