Mifanindra an-dalana ny fiakaran’ny vidin-tsolika sy ny fiakaran’ny vidin’entana fampiasa amin’ny fiainana andavanandro na ny Ppn eto Madagasikara. Miainga any amin’ireo mpamongady izany, ary mihatra hatrany amin’ireo mpaninjara madinika isan-karazany. Araka ny tsapa ankehitriny dia efa manomboka maro ireo mponina no mitaraina mikasika izany. Hita sy re izany any amin’ireo fitaovan-tserasera sy fifandraisana samihafa. Anisan’ny nahitana izany tranga izany indray izao tany Toamasina nanomboka ny fiandohan’ny herinandro lasa teo. Nifanaraka mantsy ireo mpivarotra kafe sy mofo ao an-toerana fa hampiakatra ny vidin’entana nanomboka ny alatsinainy 20 febroary teo. Izany no natao dia vokatry ny fiakaran’ny akora ilaina amin’ny fanamboarana izany toy ny menaka, lafarina sy ny maro samihafa. Lasa toy izao manaraka izao izany ny vidin’entana izany : dite tsotra, mofo gasy, ramanonaka, grefy vidina amin’ny vidiny 100Ar, raha 200Ar kosa ho an’ny menakely sy ny kafe misy ronono, ary ny kafe tsotra sy ny dite misy ronono dia vidina 150Ar.

Lucien.R