Tany Ambatondrazaka no nisehoan’izany ny alatsinainy 15 jona lasa teo tao amin’ny fokontany Tanambao.

Rangahy iray no hita faty nivalampatra irery tao an-tranony. Tsy fanaon’ity lehilahy no tsy mivoaka ny trano ka nahagaga ny teo amin’ny manodidina ny tsy nahita azy ny marainan’ny alatsinainy teo izay  nahatonga ny mpiara-monina nandodona ny varavarany. Tsy nisy namaly anefa ka nampandre ny fokontany avy hatrany izy ireo ka ity farany no nanapa-kevitra ny hanapitsoka ny varavarana. Akory anefa fa olona efa tsy miaina no novantanin’izy reo. Tamin’ny fizahan’ny mpitsabo ny razana dia nahitana ratra teo amin’ny faritra maha-lehilahy azy ary tsy tao intsony ny atodin’ny maha-lehilahy azy.

Olona nifindra monina ao amin’ny fokontany ity rangahy ity ary tsy mba tia rahoraho fa tena tso-piaina. Noho ny raharaha  tokantrano tsy nilamina no fantatra fa nifindrany monina, araka ny filazan’ny manodidina.

Mampametra-panontaniana ny maro ao Ambatodrazaka ity trangan-javatra ity satria tsy vao sambany izao, hoy ny loharanom-baovao. Vao tsy ela dia mpiandry omby no nisy nandidy tamin’ny hareza ny voam-pialahiany. Misokatra ny fanadihadiana ataon’ny mpitandro filaminana.

Laurena Nany