Tsy fantatra mazava ny niandohan’ny afo fa trano tafo bozaka iray no kila tsy nisy noraisina tao Ambatolahimaro, ao amin’ny distrikan’i Mandoto ny andron’ny alahady teo, tokony tamin’ny 3 ora tolakandro tany ho any. Tsy tao an-toerana ny tompon-trano nandritra ny firehetana. Ankizy iray nilalao teo an-tokantany no nahatsikaritra ny loza ka nampandre ireo teo amin’ny manodidina. Nifanome tanana ireto farany mba hamonoana ny afo fa nanahirana ireo mponina niatrika izany nohon’ny rivotra nifofofofo mafy. Naharitra adiny iray mahery vao maty tanteraka ny afo raha ny filazan’ny loharanom-baovao. Lasa lavenona ihany koa ilay trano sy ny fitaovana tao anatiny. May tamin’izany hatramin’ny vola, ny lovia sy ny vilany, ny vokatra, ny lamba fitafy sy ny maro hafa. Olona teo akaiky no nampandre ny tompon-trano tany an-tsaha tamin’ny voina nahazo azy ireo ka torana tsy nahatsiaro tena ilay ramatoa tompon-trano. Nentina teny amin’ny tobim-pahasalamana avy hatrany ity farany mba hahazo fitsaboana.

Laurena Nany