Dahalo iray no lavon’ny fokonolona nandritra ny fifandonana teo amin’ny roa tonta ny alin’ny 13 jona lasa teo, tao Ambatolampy. Dahalo miisa folo mirongo basim-borona vita gasy no tonga nandroba mpamboly iray tao an-toerana.Vao niditra ny tanàna ireo olon-dratsy dia nanao ramatahora tamin’ireo mponina ka  nanapoaka basy in-dimy. Nandritra izany dia tsy nisy sahy nihetsika nanohitra ny fokonolona ka lasa ny omby miisa telo tao am-bala. Nampandre ny mpitandro filaminana avy hatrany izy ireo raha vao lasa ireo dahalo. Tonga nanao fizahana tao an-toerana ny zandary ary nanao ny fanarahan-dia niaraka tamin’ireo vatan-dehilahy matanjaka tao an-tanàna. Fotoana fohy dia nifanehitra ny roa tonta ka raikitra tamin’izany ny fifandonana. Matin’ny fokonolona nandritra izany ny dahalo iray raha toa ka naratra ny mpanaradia miisa roa. Vao nahita ny namany nitsirara teo amin’ny tany ireo dahalo dia vaky nandositra avy hatrany niaraka amin’ireo omby.Tsy nisy tafaverina noho izany ireo omby ary mitohy ny fanarahan-dia ataon’ny mpitandro filaminana.