Nandritra ny tsena tamin’ny alarobia 18 jona tao Andravoahangy, tamin’ny 2ora tolakandro no nitrangan’izany. Tovolahy iray 23 taona nitondra vola roa sakaosy haterina no narahana jiolahy miisa fito avy ao aoriana. Mpiasan’ny mpamongady iray ao Andravoahangy ity ankizilahy ity ary efa fanaony ny mitondra volabe toy izao. Araka ny fantatra dia efa fahazaranan’ny tompon’ilay magazay no maniraka olona hanatitra vola azo maraina any an-tokantranony. Nisy nahatsikaritra anefa izany ka izao nihafara tamin’ny fandrobana izao.

Nobahanan’ireo olon-dratsy ilay notondra vola mba hakana an’ilay sakaosy teny aminy. Tsy nanaiky lembenana anefa ity farany fa niezaka nanohitra. Hitan’ireo jiolahy fa tsy ho azo mora ilay vola be dia notsatohan’izy ireo antsy ny lamosiny. Nitolefika ary nianjera tamin’ny tany izy. Nanararaotra izay ireo jiolahy nisintona ilay sakaosy teny aminy fa ny iray ihany no lasa tamin’izany.

Laurena Nany