Tovovavy 12 taona izay tezain-dreniny no niharan’ny habibiana nataon’ny dadatoany sy ny renibeny tao Tanamakoa, ao an-tampon’tanan’i Toamasina ny herinandro lasa teo.

Nandritra ny fotoana tsy naha teo an-dreniny dia nohararaotin’ny dadatoany ilay zazavavikely. Teo am-panantanterahana ny filan-dratsiny indrindra anefa ilay anadahi-dreniny mpamarina an-kady no niditra tampoka ilay renibeny. Tsy ny fiarovana ilay zafikeliny no nataony fa ny nifanohitra tamin’izay.

Naka rano mangotraka izy ary notobasany tamin’ny fitombenan’ilay zaza mba hanafenana ny filan-dratsin’ny zanany lahy.

Nony tonga tao an-trano ny maman’ilay zaza dia tsy nanafina ny zava-nanjo azy izy fa nitantara ny marina rehetra. Nametraka fitoriana teny amin’ny mpitandro filaminana ry zareo ka nosamborina ilay dadatoa nahavanon-doza ary efa notazomina ao amin’ny fonja Ambalatavoahangy miandry ny fitsarana azy raha toa ka mbola atao fanadihadiana ilay renibeny.

Ilay zaza kosa efa manaraka fitsaboana etsy amin’ny Hopitalibe Toamasina.

Laurena Nany