Namoan-tsampona indray ny fiara mpitatitra tamin’iny faran’ny herinandro iny satria sady namono olona no nanimba zavatra maro. Tany Ambatofotsy amin’iny lalam-pirena hihazo an’Antsirabe iny dia nahafaty olona ny fifandonana teo amin’ny fiarakely 4L sy fiara fitaterana marika Hyundai. Nipitika tany anaty lavaka mihitsy ilay 4L ary voalaza fa olona 2 no namoy ny ainy. Vao omaly ihany koa dia nandona fiara 4×4 iray ny fiara fitateram-bahoaka ao amin’ny zotra 194 teny Anosivavaka. Potika tanteraka ilay 4×4 ary naratra mafy ny mpamily azy. Nandrika ny rà teny an-toerana ary nisy mihitsy nilaza fa namoy ny ainy ilay nitondra 4×4. Soa fa nisy ireny ondana mibontsina

« Airbag » ireny ilay 4×4 fa raha tsy izany dia lasa toton-kena tao ilay mpamily. Raha ny hita teny an-toerana dia diso ilay 194 satria naka afovoany be ary tena nandeha mafy raha ny  hamafin’ny dona. Nari-koditra sy nimenomenona izay rehetra nahita ny loza ary nanao antso avo ny mba andraisan’ny UCTU fepetra faran’izay henjana manoloana ireo mpamily taksibe mpietraketraka toy izao. Efa samy nanaiky ny fiakaran’ny saran-dalana ny rehetra ka tokony mba hisy vokany amin’ny tolotra avy amin’ny mpitatitra kosa izany.