Raikitra ny fampielezan-kevitra mialohan’ny fotoana ataon’ny kandidàn’ny HVM ao amin’ny kaominina ambanivohitry Tsifota any amin’ny distrikan’ i Toliara II, 80 km avaratra andrefan’ny tanànan’i Toliara.  Tamin’ny fandalovanay tany an-toerana omaly, tao Tsifota sy Fihenena Masay, izay fokontany roa amin’ireo fito mandrafitra an’ity kaominina ambanivohitra vaovao nitambatra tamin’ny kaominina Manombo-Sud teo aloha ity, dia miranty eny rehetra eny mameno tanàna ny « poster » sy ny bileta misy ny sarin’ny kandidà Samuel Gérard sy ny laharany.

Ahitana an’ireto « poster » sy biletà HVM ireo avokoa, ny trano fisotroan-toaka (bar), toeram-pivarotana be mpivezivezy, hatramin’ny tranom-panjakana toy ny sekoly. Amin’ny andro tsena sy alahady dia tambazana vola sy zaraina « poster » sy bileta misy ny sary sy anarana ary laharan’ny kandidà HVM, ary resehana lahatra sahady hifidy ny antokom-panjakana amin’ny 31 jolay ho avy izao, ny mpiantsena na ireo hamonjy tsena sy ireo mpivavaka, raha ny fijoroana vavolomelona nataona sefo fokontany iray (L.M).

Mafy ny te-ho « Maire », mandrovo-tsihy mamalan-kira sy tsy manara-dalàna ny. Ny tranga toy izao no mampihena ny fitokisan’ny vahoaka ny mpanao politika matin-tseza ary mandratsy endrika ny mpitondra amin’ny fihoaram-pefy ataona kandidam-panjakana mamalan-kira tsy tan-dalàna. Miandry ny fandraisana andraikitry ny CENIT ny vahoaka any an-toerana amin’ny fampiharana ny lalàna sy hisian’ny mangaharaha lavitry ny fitanilana.

Eric Toliara