Efa simba tanteraka ilay razana vao hitan’ ny teo amin’ny manodidina. Tany an-tampon-tananan’Antalaha no nisehoan’izany ny faran’ny herinandro teo, tao amin’ny fokontany Antsonasona. Mipetraka irery ity ramatoa efa 80 taona  any ho any sady tsy manan-janaka. Tsy mba miresaka amin’ny manodidina izy ka tsy nahataitra ny olona ny tsy nahitana azy efa herinandro mahery tao an-toerana. Ny alahady teo anefa gaga ny teo amin’ny manodidina raha nahita lalitra marobe nitangorona teo amin’ny rindrina ary nisy fofona hafahafa ka nahalasa saina ny maro. Nampiantso ny sefo fokontany avy hatrany izy ireo mba hijery ny zava-misy. Nodonina ny varavarana nefa tsy nisy namaly.

Farany, lasa nampandre ny mpitandro filaminana ny mponina. Niafara tamin’ny fanapoirana ny varavaran’ilay ramatoa be izany. Teo vao taitra ny rehetra fa faty efa simba tanteraka no nitsena azy ireo tao. Nampandre ireo havany ny manodidina ary tsy nandrasana intsony ilay faty fa tonga dia nalevina avy hatrany.

Laurena Nany