Mahakasika ny fivoahan’ny politikan’ny fananan-tany faharoa nivoaka ny 26 Mey 2015 teo dia nanao fanambarana ny Sehatra Iombonana hoan’ny Fananan-tany na SIF fa mandringa io politika vaovao io. Ny vovonana SIF dia isan’ireo nandray anjara tamin’ny famolavolana izany taratasin’ny politakan’ny fananan-tany izany. Raha zohina mantsy ny ao anatin’io taratasin’ny politikan’ny fananan-tany io dia ireo olona efa manana tany ihany no afaka manao fiarovana. Ahoana kosa izany ireo tsy manana ? Tokony ho dinihana ihany koa ny fampiasana ny tany satria ny politikan’ny fananan-tany eto Madagasikara dia efa tamin’ny andron’ny fanjanahantany, izany hoe efa tamin’ny taona 1896.

Tamin’izany andro dia ny tany tsisy « titre » dia natokana ho an’ny fanjakana.  Ny tanjona dia ny hananan’i Madagasikara politikan’ny fananan-tany mifototra amin’ny fomba amam-panao sy ny foto-pisainana malagasy mba hampanjary ny tany amin’ny alalan’ny asa atao aminy.  Mbola mila ezaka noho izany ny famolavolana ny fandaharanasa satria tsy mbola maneho ny tena politikan’ny fananan-tany tena izy ny taratasin’ny politikan’ny fananan-tany izay nivoaka io. Ho an’ny SIF manokana dia efa am-pirosoana amin’ny famolavolana ny fandaharan’asa amin’ny fanantanterahana io politika vaovao io izy ireo.