Amin’izao ankatoky ny fankalazana ny fetim-pirenena izao dia tsy diso anjara ireo vehivavy voafonja ao amin’ny fonjan’Ambalatavoahangy ao Toamasina.

Nidina teny an-toerana ny Fikambanana malagasy mijoro (FIMAMI) nitondra izay voatsirambin’ny tanany ho an’ireo vehivavy ireo.

Mahatratra 1091 ny isan’ ireo voafonja ao Ambalatavoahangy ka ny 58 amin’ireo dia vehivavy. Vary roa gony sy lamba fitafy no nomena azy ireo nandritra ny fitsidihin’ny FIMAMI teny an-toerana. Manan-jo hifety amin’izao fetim-pirenena izao ireo mamita ny saziny any am-ponja, ka izay no nanosika ny fikambanana hanao izao tolo-tanana izao. Ity hetsika sosialy ity dia ao anatin’ny fandaharan’asan’ny fikambanana ka atao amin’ity enim-bolana manaraka amin’ity taona ity, izay tapaka nandritra ny fivoariambe notanterahan’izy ireo ny sabotsy 13 jona lasa teo.

Tsy vao izao fa efa fanaon’ity fikambanana ity ny tolo-tanana amin’ireo olona tsy manana ny ampy. Ny fanampiana ireo olona ireo dia ao anatin’ny filamatry ny fikambanana.

Laurena Nany