« Raha tonga mialoha ireo mpamonjy voina dia tsy maro be tahaka izao ny trano may » hoy ny fitarainan’ireo niharam-boina. Araka ny tatitra voaray dia vao nirehitra ilay afo dia nampandre ny mpamonjy voina avy hatrany izy ireo saingy adiny iray sy sasany aty aoriana ireto farany vao tonga. Tsy vitan’izany ihany kao fa mbola tsy ampy ny rano nentin’izy ireo ka mbola niverina indray naka rano sady mbola ela be izany. Vokany, trano 15 tafo lasa lavenona tao Bevoalavo ao amin’ny fokontany Marinike, bazary Scama ary mahatratra 84 ireo fianakaviana tsy manan-kialofana. Ny marainan’ny alahady 28 jona teo no nisehoan’izany. Mbola tsy fantatra kosa hatreto ny antony nahatonga ny loza fa vao nirehitra ny afo dia nifanome tanana ireo mponina mandra-piandrasana ireo mpamonjy voina.

Kila forehitra nandritra izany ny voamaina, ny balahazo, ny tsako, anisan’izany ny varotra  tsy lany  tamin’ny fety sy ny maro hafa. Mitentina mahery ny dimam-polo tapitrisa ny fahavoazana nahazo ireo mpivarotra araka ny vaovao voaray.

Laurena Nany