Misesy ny lozam-pifamoivoizana ao amin’ny distrikan’i Ambatondrazaka tamin’ity herinandro. Ao anatin’ny iray andro, mahatratra telo ny loza aterak’izany lozam-pifamoivoizana izany any an-toerana. Vokatry ny tsy fitandremana no tena mahatonga ny loza ary ireo môtô no tena manao an’izany araka ny vaovao voaray. Raha tsiahivina dia ny alatsinainy 29 jona teo, tamin’ny 12 ora atoandro tao Avaradrova Avaratra dia taksi-môtô nifandona tamin’ny fiara vaventy iray vokatry ny fandehanana mafy avy amin’ilay môtô. Nifanandrify tamin’io  ihany koa dia taksi-môtô roa nifandona tao Ambohimasina.

Ny ampitson’io, ny talata faha-30 jona tao amin’ny fokontany Madiotsifafana dia môtô iray nianjera noho ny fandehanana mafy. Naratra mafy vokatr’izany ny mpamily an’ity kodiaran-droa ity.

Saika isan’andro, araka izany, dia isehoana lozam-pifamoivoizana hatrany ao Ambatondrazaka. Tokony henjanina ny lalàna mifehy ity sehatra iray ity mba hampihenana farafaharatsiny ny loza miseho ao an-toerana.

Laurena Nany