Sambava – Lavanila 452 kilao tsy ara-dalàna saron’ny polisy
Mitohy ny fandikana lalàna ataon’ireo mpanangom-bokatra any amin’iny Faritra Sava iny. Tokantrano iray no nahatratraran’ny mpitandro filaminana lavanila tsy ara-dalàna tao Antanambao Dahoda any amin’ny distrikan’i Sambava ny talata lasa teo. Tamin’ny fisavana notanterahan’ireo manam-pahefana io tokantrano io dia mahatratra 452 kilao ny lanjan’izany lavanila izany. Rehefa nangatahana ny taratasin’ity entana ity ilay lehilahy milaza ho tompon’izany dia tsy nanana taratasy mazava momba io lavanila io izy. Fantatra koa anefa fa tsy mpamboly velively ity rangahy ity. Nogiazana avy hatrany ao amin’ny biraon’ny zandary ao Sambava avokoa ireo vokatra ireo hatreto.
Telo lahy ihany koa no saron’ny polisim-pirenena nitondra lavanila tsy misy taratasy tany Andapa tamin’ny fiandohan’ny herinandro. Lavanila tamin’ny gony maromaro no hita teny amin’izy telo lahy ary fantatra fa lavanila halatra izany. Taorian’ny fanadihadiana natao azy ireo dia naverina any amin’ny tompony ireo vokatra ireo.