Laharam-pahamehana ho an’ny Tahirim-pirenena momba ny  Fiahiana ara-tsosialy (CNaPS) ny fanapariham-pahefana. Ankoatra ny fametrahana  birao na tendro any amin’ny faritra dia nisy ihany koa ny fanorenana trano fonenana ho an’ireo mpiasa tao amin’ny renivohitry ny Faritra Atsinanana. Izany no natao dia mba hanamorana ny fanatontosan’ireo mpiasam-panjakana ny asany.

Anisan’ny sakana tsy mampazoto ny mpiasa hiasa any amin’ny faritra mantsy ny tsy fisian’ny trano fonenana na  koa ny fahalafosan’ny hofan-trano. Nambaran’ny Tale jeneralin’ny CNaPS Arizaka Rabekoto fa tsy sazy ny fandefasana mpiasa hiasa any amin’ny faritra fa endrika iray entina anehoana ny fivoizan’ny CNaPS ny fanapariaham-pahefana. Nohavaozina ihany koa ny trano fandraisana olona ao Toamasina.

Nisy ny fanaovana sonia fiaraha-miasa teo amin’ny CNaPS sy ny CTM andaniny; ary ankilany ny CNaPS sy ny « Centre  de ressources de travailleurs » (CRT). Voarakitra ao anatin’ity fifanaraham-piaraha-miasa ity fa anjaran’ireo mpikambana ao anatin’ity fiombonan’ny mpiasa ny manao drafitr’asa enti-manatanteraka ny fampiofanana izay nataon’izy ireo tamin’ny volana jona lasa teo. Anjaran’ny CNaPS foibe  kosa no manampy ara-pitaovana sy ara-bola ny tetik’asa.

Nangonin’i Ericka